Nagi Baraha Shrine

मगर बाहुल्यता रहेको म्याग्दीमा मगर जातिको उत्पत्ति, दर्शन र मगरात सभ्यताको अध्ययन–अनुसन्धान भोलि देखि पाखापानीबाट गरिने भएको छ । 

नेपाल मगर सङ्घ केन्द्रीय समितिको आयोजना र नेपाल मगर सङ्घ जिल्ला समन्वय समितिको संयोजनमा वैशाख १० गतेदेखि पहिलो चरणमा जिल्लाका रघुगङ्गा, मालिका र धवलागिरि गाउँपालिकामा अध्ययन गरिने नेपाल मगर सङ्घ जिल्ला समन्वय समिति म्याग्दीका अध्यक्ष लोकबहादुर पुनमगर (लोकेश) ले जानकारी दिएका छन् ।

नेपाल मगर संघका केन्द्रीय अध्यक्ष ज्ञानेन्द्र पुन लगायत विज्ञ व्यक्तिहरुको टोलि वैशाख १० गते रघुगङ्गा गाउँपालिका–६ पाखापानीमा आएर अनुसन्धानको पहिलो चरणको शुरुवात गरिने भएको छ । वैशाख ११ गते दरबार भग्नावशेष अवलोकन, अन्तरक्रिया कार्यक्रम गरिने छ भने सोही दिन मालिका गाउँपालिका–५ देविस्थान र वैशाख १२ गते धवलागिरिको केन्द्र मुनामा कार्यक्रम गर्ने बताइएको छ ।

नेपालमा जातिगत जनसङ्ख्याको हिसाबले मगर नेपालको तेस्रो ठूलो जाति हो भने आदिवासी जनजाति समुदायको पहिलो हो । साथै म्याग्दी जिल्लामा मगरको जनसंख्या पहिलो हो ।